چیف جسٹس یحییٰ آفریدی کے اعلان سے کورٹ کچہری کا چکر ختم

چیف جسٹس آف پاکستان جسٹس یحییٰ آفریدی نے بلوچستان کے دارالحکومت کوئٹہ میں ایک جدید سہولت مرکز کا باضابطہ افتتاح کر دیا ہے، جس کے بعد سائلین اور وکلاء کو تمام عدالتی خدمات ایک ہی چھت تلے میسر آئیں گی۔ اس موقع پر تقریب سے خطاب کرتے ہوئے انہوں نے کہا کہ ایسے مراکز کے قیام سے نہ صرف عوام کے وقت کی بچت ہوگی بلکہ انصاف کی فوری اور شفاف فراہمی کا عمل بھی تیز تر ہو جائے گا۔

چیف جسٹس یحییٰ آفریدی نے بلوچستان آمد پر مسرت کا اظہار کرتے ہوئے کہا کہ عدالتی نظام میں اصلاحات اور سائلین کو خوار ہونے سے بچانا وقت کی اہم ترین ضرورت ہے۔ انہوں نے اعلان کیا کہ اس طرز کے سہولت مراکز کا دائرہ کار صرف کوئٹہ تک محدود نہیں رہے گا بلکہ اسے بلوچستان کے ہر ضلع، ہر تحصیل اور بعد ازاں ملک بھر کے تمام ڈسٹرکٹس تک وسعت دی جائے گی تاکہ دور دراز علاقوں کے شہری بھی اس سے مستفید ہو سکیں۔

خطاب کے دوران چیف جسٹس نے ایک اور اہم اور تاریخی قدم کی نشاندہی کرتے ہوئے بتایا کہ غریب اور ضرورت مند افراد کے لیے قانون تک رسائی آسان بنانے کی خاطر “جسٹس فنڈ” قائم کرنے کا فیصلہ کیا گیا ہے۔ انہوں نے 8 اگست کے شہداء کو خراج تحسین پیش کرتے ہوئے اس عزم کا اعادہ کیا کہ شہداء کی قربانیوں کی پاسداری کا واحد راستہ آئین، قانون کی حکمرانی اور مظلوم کو بروقت انصاف کی فراہمی کو یقینی بنانا ہے۔