رواں سال پولیو کا ساتواں کیس کراچی سے رپورٹ

کراچی: ملک میں پولیو وائرس کا پھیلاؤ تشویش کا باعث بننے لگا، کراچی شرقی سے رواں سال پولیو کا ساتواں کیس رپورٹ ہوگیا، جس کے بعد 2026 میں اب تک ملک بھر میں سامنے آنے والے کیسز کی تعداد 7 ہوگئی ہے۔

نیشنل ایمرجنسی آپریشنز سینٹر (نیشنل ای او سی) کے مطابق رواں سال رپورٹ ہونے والے سات کیسز میں سے پانچ خیبر پختونخوا جبکہ دو سندھ سے سامنے آئے ہیں۔ کراچی میں اس سے قبل پولیو کا آخری کیس دسمبر 2024 میں رپورٹ ہوا تھا۔

نیشنل ای او سی کے مطابق انسدادِ پولیو کی قومی مہم 2 سے 8 نومبر 2026 تک جاری رہے گی۔ اس مہم کے دوران کراچی کے تمام اضلاع سمیت ملک کے 97 اضلاع میں پانچ سال سے کم عمر بچوں کو پولیو سے بچاؤ کے قطرے پلائے جائیں گے۔

حکام کے مطابق مہم کے دوران 2 کروڑ 39 لاکھ سے زائد بچوں کو پولیو ویکسین پلانے کا ہدف مقرر کیا گیا ہے۔

نیشنل ای او سی نے والدین پر زور دیا ہے کہ وہ ہر انسدادِ پولیو مہم کے دوران اپنے پانچ سال سے کم عمر بچوں کو ویکسین ضرور پلوائیں اور حفاظتی ٹیکہ جات کا کورس بھی بروقت مکمل کروائیں۔

پولیو ایک لاعلاج بیماری ہے، تاہم ویکسین کے ذریعے بچوں کو اس خطرناک مرض سے محفوظ رکھا جا سکتا ہے۔