فنانس ایکٹ : غلط ان پٹ ٹیکس کریڈٹ پر 20 فیصد جرمانہ عائد ہوگا

اسلام آباد: فنانس ایکٹ 2026-27 کے تحت غلط یا غیر مطابقت رکھنے والے ان پٹ ٹیکس کریڈٹ کا دعویٰ کرنے والے ٹیکس دہندگان کے خلاف کارروائی سخت کردی گئی ہے۔

نئے قانون کے مطابق متعلقہ ٹیکس دہندہ کو غیر قابلِ قبول ان پٹ ٹیکس کریڈٹ واپس کرنے کے ساتھ اصل ٹیکس رقم کا 20 فیصد جرمانہ اور انکم ٹیکس ایکٹ کی دفعہ 34 کے تحت ڈیفالٹ سرچارج بھی ادا کرنا ہوگا۔

ایف بی آر کے کمپیوٹرائزڈ نظام میں اگر کسی رجسٹرڈ شخص کے کلیم کردہ ان پٹ ٹیکس کریڈٹ اور متعلقہ سپلائر کے ظاہر کردہ آؤٹ پٹ ٹیکس میں عدم مطابقت سامنے آتی ہے تو ٹیکس دہندہ کو نوٹس جاری کرکے وضاحت اور سماعت کا موقع دیا جائے گا۔

اگر وضاحت کے باوجود فرق برقرار رہنے کی تصدیق ہوجائے تو غیر مطابقت رکھنے والا ان پٹ ٹیکس کریڈٹ ناقابلِ قبول قرار دے کر واپس لینا ہوگا۔

فنانس ایکٹ کے تحت جعلی انوائسز پر کلیم کیے گئے ٹیکس کریڈٹ کو 60 روز کے اندر واپس نہ کرنے کی صورت میں بھی 20 فیصد جرمانہ عائد ہوگا۔