ایران ایک ہفتے کے دوران 59 زلزلوں کے جھٹکوں سے لرز اٹھا

تہران: ایران میں 15 سے 21 اگست کے دوران مجموعی طور پر 59 زلزلے ریکارڈ کیے گئے، جس کے بعد ملک میں زلزلہ خیزی سے متعلق تشویش میں اضافہ ہوگیا۔

تہران یونیورسٹی کے انسٹی ٹیوٹ آف جیو فزکس کے مطابق ایک ہفتے کے دوران 54 زلزلوں کی شدت 3 سے کم، 3 کی شدت 3 سے 4 جبکہ 2 زلزلوں کی شدت 4 سے 5 کے درمیان رہی۔

رپورٹ کے مطابق 19 اگست کو کرمانشاہ میں آنے والے زلزلے کی شدت 4.2 ریکارڈ کی گئی۔ صوبوں میں خراسان رضوی 13 زلزلوں کے ساتھ سب سے زیادہ متاثر ہوا، جبکہ کرمانشاہ اور کرمان میں 7،7 اور سمنان میں 6 زلزلے ریکارڈ کیے گئے۔

تہران یونیورسٹی کے مطابق مارچ 2025 سے مارچ 2026 تک ایران میں 2.5 سے زیادہ شدت کے 2 ہزار 380 زلزلے ریکارڈ کیے گئے، جن میں 910 زلزلوں کی شدت 3 سے زیادہ، 130 کی شدت 4 سے زیادہ اور 15 زلزلوں کی شدت 5 سے زیادہ تھی۔

ایران دنیا کے زلزلہ خیز خطوں میں شمار ہوتا ہے اور ملک میں آنے والے زلزلوں کی بڑی تعداد کے باعث ماہرین کی جانب سے زلزلہ جاتی سرگرمیوں پر مسلسل نظر رکھی جاتی ہے۔