اڈیالہ کے 3 قیدیوں کا پرائیوٹ اسپتال میں علاج کے کیس کا فیصلہ محفوظ، دوران سماعت عمران خان کا تذکرہ

اسلام آباد: اسلام آباد ہائیکورٹ نے اڈیالہ جیل کے تین قیدیوں کو نجی اسپتال سے علاج کی سہولت فراہم کرنے سے متعلق درخواستوں پر فیصلہ محفوظ کرلیا۔

سماعت کے دوران درخواست گزاروں کے وکیل نے بانی پی ٹی آئی عمران خان کے کیس کا حوالہ دیتے ہوئے مؤقف اختیار کیا کہ سپریم کورٹ نے 18 اگست کے حکم میں نجی اسپتال سے علاج کی اجازت دی تھی، تو یہی سہولت عام قیدیوں کو بھی کیوں نہیں دی جاسکتی۔

وکیل نے عدالت کو بتایا کہ ایک قیدی اندرونی خون بہنے کے مرض میں مبتلا ہے جبکہ دوسرے کو دل کا عارضہ لاحق ہے اور اس کے جسم کا نچلا حصہ کام نہیں کرتا۔ درخواست گزاروں کے مطابق انہیں علاج کے لیے مناسب طبی سہولیات درکار ہیں۔

اسلام آباد اور پنجاب کے ایڈووکیٹ جنرلز نے قیدیوں کو نجی اسپتال منتقل کرنے کی مخالفت کرتے ہوئے کہا کہ جیل رولز کے تحت بیمار قیدیوں کے علاج کا مکمل نظام موجود ہے اور سرکاری اسپتالوں میں علاج کی سہولت فراہم کی جاتی ہے۔

جسٹس محمد آصف نے ریمارکس دیے کہ اگر کسی قیدی کو سنگین بیماری لاحق ہو تو اس کی صحت سے سمجھوتا نہیں کیا جاسکتا۔ عدالت نے یہ بھی سوال اٹھایا کہ اگر سرکاری اسپتال میں کسی مخصوص بیماری کا مناسب علاج ممکن نہ ہو تو ایسی صورت میں کیا طریقہ اختیار کیا جائے گا۔

سماعت کے دوران پمز اسپتال کی طبی سہولیات پر بھی گفتگو ہوئی۔ عدالت نے فریقین کے دلائل سننے کے بعد تینوں درخواستوں پر فیصلہ محفوظ کرلیا۔