پاک فوج کویتی مسلح افواج کی تربیت و سرحدی دفاع میں معاونت فراہم کرے گی، معاہدے پر دستخط

اسلام آباد: پاکستان اور کویت نے دفاعی تعاون مزید مضبوط بنانے کے لیے پروٹوکول ایگریمنٹ 2026ء پر دستخط کردیے۔
کویتی وزیر دفاع شیخ عبداللہ علی عبداللہ السلیم الصباح کی سربراہی میں اعلیٰ سطح کے وفد نے وزارت دفاع راولپنڈی میں وزیر دفاع خواجہ محمد آصف سے ملاقات کی، جس میں باہمی دلچسپی کے امور، دوطرفہ دفاعی تعلقات اور سکیورٹی تعاون پر تبادلہ خیال کیا گیا۔
معاہدے کے تحت پاک فوج کویتی مسلح افواج کو تربیت، استعداد کار میں اضافے، سرحدی انتظام اور دفاعی تعاون کے دیگر طے شدہ شعبوں میں معاونت فراہم کرے گی۔ نئے معاہدے سے 2023ء میں طے پانے والے دفاعی تعاون کے فریم ورک کو مزید وسعت ملے گی۔
دونوں ممالک نے معاہدے کو باہمی اعتماد، احترام اور مشترکہ تزویراتی مفادات کا عکاس قرار دیتے ہوئے دفاعی شراکت داری مزید مضبوط بنانے کے عزم کا اظہار کیا۔

کویتی وزیر دفاع کی آرمی چیف سے ملاقات
قبل ازیں کویتی وزیر دفاع کی سربراہی میں وفد نے جنرل ہیڈ کوارٹرز (جی ایچ کیو) راولپنڈی کا دورہ کیا اور آرمی چیف و چیف آف ڈیفنس فورسز فیلڈ مارشل سید عاصم منیر سے ملاقات کی۔
ملاقات میں علاقائی سلامتی، باہمی دلچسپی کے امور اور پاک کویت دفاعی تعاون پر تبادلہ خیال کیا گیا۔ کویتی وفد نے علاقائی امن و استحکام کے لیے پاکستان کی مسلح افواج کی پیشہ ورانہ اور آپریشنل مہارت کو سراہا۔
دونوں فریقین نے ادارہ جاتی روابط مضبوط بنانے اور دفاعی تعاون کو مزید وسعت دینے پر اتفاق کیا، جبکہ باہمی سلامتی، علاقائی امن اور استحکام کے فروغ کے لیے مشترکہ کوششیں جاری رکھنے کے عزم کا اعادہ کیا۔