جماعت اسلامی کا 12ربیع الاول کے بعد ملک گیر شٹر ڈاؤن ہڑتال کا اعلان

کراچی: امیر جماعت اسلامی پاکستان حافظ نعیم الرحمان نے پیٹرولیم لیوی کے خلاف احتجاجی تحریک کو مزید آگے بڑھاتے ہوئے 12 ربیع الاول کے بعد ملک گیر شٹر ڈاؤن ہڑتال کا اعلان کردیا۔

کراچی میں پریس کانفرنس کرتے ہوئے حافظ نعیم الرحمان نے کہا کہ جماعت اسلامی کی جدوجہد بہترین انداز میں جاری ہے، حکومت کو پیٹرولیم مصنوعات کی قیمتوں میں کمی کرنا پڑے گی۔

انہوں نے کہا کہ ملک میں آٹا اور چینی مافیا موجود ہے، ایسے حالات میں ترقی ممکن نہیں۔ کسانوں کو سستی کھاد دستیاب نہیں، جبکہ عوام کے ٹیکس کے پیسوں سے سرکاری افسران بڑی بڑی گاڑیاں استعمال کر رہے ہیں۔

امیر جماعت اسلامی کا کہنا تھا کہ 12 ربیع الاول کے بعد ملک گیر شٹر ڈاؤن ہڑتال کی جائے گی، مذاکرات اس وقت تک نتیجہ خیز نہیں ہوں گے جب تک حکومت مطالبات پر عملی اقدامات نہیں کرتی۔

انہوں نے کہا کہ دھرنے ختم کرنے کا فیصلہ حکومت کی جانب سے مطالبات تسلیم کیے جانے کے بعد ہی ہوگا۔

واضح رہے کہ جماعت اسلامی نے پیٹرولیم لیوی کے خلاف ملک بھر میں گورنر ہاؤسز کے باہر دھرنے دے رکھے ہیں، جو اب آٹھویں روز میں داخل ہوچکے ہیں۔