ٹرمپ کا ایران کے خلاف اقتصادی جنگ کا اعلان، حمایت کرنے والے ممالک کو بھی سنگین نتائج کی دھمکیاں

واشنگٹن: امریکی صدر ڈونلڈ ٹرمپ نے ایران کے خلاف سخت معاشی اقدامات کا اعلان کرتے ہوئے کہا ہے کہ تہران کو عالمی سطح پر تنہا کرنے کے لیے بڑے پیمانے پر کارروائیاں کی جائیں گی۔

ٹرمپ نے اپنے بیان میں کہا کہ ایران کو مذاکرات اور معاہدے کے لیے کئی مواقع فراہم کیے گئے، تاہم اس نے ان سے فائدہ نہیں اٹھایا۔ انہوں نے کہا کہ امریکا اب ایران کے خلاف اقتصادی دباؤ میں مزید اضافہ کرے گا۔

امریکی صدر نے خبردار کیا کہ جو ممالک ایران کو مالی یا معاشی مدد فراہم کریں گے، انہیں بھی سنگین نتائج کا سامنا کرنا پڑ سکتا ہے۔

انہوں نے ایران کی تیل تجارت، مالی لین دین، کیش ٹرانسفرز، ایکسچینج ہاؤسز، شپ رجسٹریز اور دیگر ذرائع سے تعاون روکنے پر زور دیا۔

ٹرمپ کا کہنا تھا کہ ایران کی فوجی صلاحیتوں اور معیشت کو نقصان پہنچا ہے، جبکہ انہوں نے ایک بار پھر دعویٰ کیا کہ ایران کبھی جوہری ہتھیار حاصل نہیں کر سکے گا۔

امریکی صدر نے اپنی پالیسی کو “اقتصادی ڈی ڈے” قرار دیتے ہوئے کہا کہ امریکا اپنے اتحادی ممالک کے ساتھ مل کر ایران پر دباؤ بڑھانے کے لیے اقدامات کرے گا۔