عمران خان کی نجی اسپتال منتقلی؛ خواجہ آصف کا سخت مؤقف سامنے آ گیا

اسلام آباد: وزیر دفاع خواجہ آصف نے بانی پی ٹی آئی عمران خان کو علاج کے لیے نجی اسپتال منتقل کرنے کے عدالتی اقدام پر تحفظات کا اظہار کرتے ہوئے کہا ہے کہ اس سے دیگر قیدیوں کے لیے بھی نجی اسپتالوں میں علاج کے راستے کھل جائیں گے۔

نجی ٹی وی سے گفتگو کرتے ہوئے خواجہ آصف نے کہا کہ انصاف کے تقاضے سب کے لیے یکساں ہونے چاہییں، کسی ایک شخص کو خصوصی سہولت فراہم نہیں کی جانی چاہیے۔

انہوں نے کہا کہ مسلم لیگ (ن) کی قیادت نے ماضی میں بھی علاج کے لیے سرکاری اسپتالوں کا انتخاب کیا، جبکہ نواز شریف کے آپریشن کے دوران پیش آنے والے ایک واقعے کا بھی ذکر کیا۔

وزیر دفاع کا کہنا تھا کہ اگر سپریم کورٹ کے فیصلے میں حکومت کا مؤقف شامل کرنے کی قانونی گنجائش موجود ہوئی تو حکومت اس معاملے پر اپنا مؤقف ضرور پیش کرے گی۔

خواجہ آصف نے پی ٹی آئی دور حکومت کا حوالہ دیتے ہوئے کہا کہ اس وقت اپوزیشن کے ساتھ اختیار کیے گئے رویے اور استعمال کی گئی زبان سب کے سامنے ہے۔