ڈسٹرکٹ آفیسر ایجوکیشن عبدالرزاق میاں خیل کا شاہ کاریز اسکول کا دورہ، تعلیمی امور کا جائزہ

ڈسٹرکٹ آفیسر ایجوکیشن عبدالرزاق میاں خیل کا شاہ کاریز اسکول کا دورہ، تعلیمی امور کا جائزہ

لورالائی(میاں محمدعامربشیر آرائیں )ڈسٹرکٹ آفیسر ایجوکیشن لورالائی جناب عبدالرزاق میاں خیل نے شاہ کاریز اسکول کا دورہ کیا، جہاں اسکول کے تعلیمی و انتظامی امور کا تفصیلی جائزہ لیا گیا۔ اس موقع پر اسکول کے پرنسپل عبدالقاہر اتمانخیل نے ڈسٹرکٹ آفیسر ایجوکیشن کو اسکول کی مجموعی صورتحال، تعلیمی سرگرمیوں، طلبہ کی حاضری اور دیگر امور کے حوالے سے تفصیلی بریفنگ دی۔دورے کے دوران جماعت ہشتم کے امتحانی فارمز کے حوالے سے بھی اہم اجلاس ہوا، جس میں امتحانی فارمز کو جلد از جلد مکمل کرکے ڈسٹرکٹ ایجوکیشن آفس میں جمع کرانے کے حوالے سے ضروری ہدایات اور امور پر تفصیلی گفتگو کی گئی۔
ڈسٹرکٹ آفیسر ایجوکیشن عبدالرزاق میاں خیل نے کہا کہ طلبہ کے امتحانات سے متعلق تمام انتظامات بروقت مکمل کیے جائیں تاکہ بچوں کو کسی قسم کی دشواری کا سامنا نہ کرنا پڑے۔ انہوں نے اساتذہ پر زور دیا کہ طلبہ کی تعلیمی تیاری پر خصوصی توجہ دی جائے اور انہیں امتحانات کے لیے بھرپور رہنمائی فراہم کی جائے۔
انہوں نے کہا کہ تعلیم بچوں کے روشن مستقبل، معاشرے کی خوشحالی اور ملک کی ترقی کی بنیادی ضمانت ہے۔ اگر ایک گھر میں ایک تعلیم یافتہ فرد پیدا ہوتا ہے تو اس کے مثبت اثرات صرف اسی گھر تک محدود نہیں رہتے بلکہ پورا علاقہ علم، شعور اور ترقی کی طرف گامزن ہوتا ہے۔ڈسٹرکٹ آفیسر ایجوکیشن نے اسکول انتظامیہ کی کاوشوں کو سراہتے ہوئے تعلیمی معیار کو مزید بہتر بنانے اور طلبہ کو معیاری تعلیم کی فراہمی کے لیے بھرپور کردار ادا کرنے پر زور دیا۔