کوئٹہ میں سیکیورٹی سخت، طلبہ و طالبات کو تعلیمی اداروں تک رسائی میں مشکلات

صوبائی دارالحکومت کوئٹہ میں سیکیورٹی صورتحال کے پیش نظر مختلف علاقوں میں سخت حفاظتی اقدامات کے باعث طلبہ و طالبات کو اسکولوں، کالجوں اور جامعات تک پہنچنے میں مشکلات کا سامنا ہے۔

شہریوں اور والدین کے مطابق اہم شاہراہوں پر چیکنگ، رکاوٹوں اور ٹریفک کی روانی متاثر ہونے کے باعث طلبہ کو تعلیمی اداروں تک پہنچنے میں معمول سے زیادہ وقت لگ رہا ہے۔ بعض علاقوں میں راستوں کی بندش اور آمدورفت محدود ہونے سے مشکلات مزید بڑھ گئی ہیں۔

والدین کا کہنا ہے کہ روزانہ کی بنیاد پر سخت سیکیورٹی اقدامات کے باعث بچوں کی آمدورفت کے حوالے سے تشویش پائی جاتی ہے، خصوصاً دور دراز علاقوں سے آنے والے طلبہ کو ٹریفک جام اور طویل چیکنگ کا سامنا کرنا پڑ رہا ہے۔

طلبہ نے کہا کہ امن و امان کے لیے سیکیورٹی اقدامات ضروری ہیں، تاہم ایسے انتظامات کیے جائیں جن سے تعلیمی سرگرمیاں اور شہریوں کی معمول کی نقل و حرکت کم سے کم متاثر ہو۔

شہری حلقوں نے حکام سے مطالبہ کیا ہے کہ سیکیورٹی اقدامات کے ساتھ ساتھ ٹریفک مینجمنٹ کو بہتر بنایا جائے اور تعلیمی اداروں تک طلبہ کی بروقت اور محفوظ رسائی کے لیے متبادل راستوں کا انتظام کیا جائے۔