پاکستان کی شام میں اسرائیلی حملوں کی مذمت، عالمی برادری سے فوری کردار ادا کرنے کا مطالبہ

اسلام آباد: پاکستان نے شام میں اسرائیلی حملوں کی شدید مذمت کرتے ہوئے عالمی برادری سے مطالبہ کیا ہے کہ وہ خطے میں امن و استحکام کے لیے اپنا کردار ادا کرے۔

دفتر خارجہ کے ترجمان کے مطابق پاکستان نے ادلب میں ابو الظہور ایئربیس پر اسرائیلی حملے کو عالمی قوانین کی خلاف ورزی قرار دیا ہے۔

ترجمان نے کہا کہ ایسی اشتعال انگیز کارروائیاں علاقائی امن و استحکام کو مزید نقصان پہنچا سکتی ہیں۔ پاکستان شامی عوام کے ساتھ یکجہتی کا اظہار کرتا ہے اور شام کی خودمختاری، علاقائی سالمیت، امن اور خوشحالی کے لیے اپنی حمایت کا اعادہ کرتا ہے۔

دفتر خارجہ نے عالمی برادری پر زور دیا کہ وہ اسرائیلی کارروائیوں کے خاتمے اور بین الاقوامی قوانین کی پاسداری یقینی بنانے کے لیے مؤثر اقدامات کرے۔

پاکستان کا کہنا ہے کہ خطے میں پائیدار امن کے لیے تمام ممالک کی خودمختاری اور علاقائی سالمیت کا احترام ضروری ہے۔