وہ دن دور نہیں جب بلوچستان سے دہشت گردی کا جڑ سے خاتمہ ہو جائے گا، صدر مملکت

اسلام آباد: صدر مملکت آصف علی زرداری نے کہا ہے کہ وہ دن دور نہیں جب بلوچستان سے دہشت گردی کا مکمل خاتمہ ہو جائے گا۔

صدر مملکت سے وزیراعلیٰ بلوچستان میر سرفراز بگٹی نے ایوانِ صدر میں ملاقات کی، جس میں صوبے کی مجموعی صورتحال، امن و امان اور جاری ترقیاتی منصوبوں پر تبادلہ خیال کیا گیا۔

ملاقات کے دوران صدر زرداری نے کہا کہ بلوچستان میں امن، ترقی اور عوامی فلاح کے لیے وفاقی اور صوبائی حکومتوں کے درمیان مؤثر تعاون ضروری ہے۔ انہوں نے کہا کہ رقبے کے لحاظ سے پاکستان کا سب سے بڑا صوبہ خصوصی توجہ اور وسائل کا حقدار ہے۔

صدر مملکت نے کہا کہ بیرونی سرپرستی میں سرگرم دہشت گرد عناصر بلوچستان کی ترقی کی راہ میں رکاوٹیں ڈالنے کی کوشش کر رہے ہیں، جنہیں ہر صورت ناکام بنایا جائے گا۔

انہوں نے اس عزم کا اظہار کیا کہ حکومت اور اداروں کی مشترکہ کوششوں سے بلوچستان میں امن و استحکام قائم ہوگا۔

ملاقات میں پیپلز پارٹی خواتین ونگ کی صدر فریال تالپور اور بلوچستان کے سابق وزیر میر علی حسن زہری بھی موجود تھے۔