آپریشن ردالفتنہ 3 کے تحت بلوچستان میں کارروائیاں، 9 دہشت گرد ہلاک

کوئٹہ: بلوچستان میں آپریشن ردالفتنہ 3 کے تحت سیکیورٹی فورسز کی کارروائیاں جاری ہیں، جن میں مزید 9 دہشت گرد مارے گئے ہیں۔

سیکیورٹی ذرائع کے مطابق زیارت، ہرنائی اور سوراب کے علاقوں میں دہشت گردوں کے خلاف انٹیلی جنس بنیادوں پر آپریشن کیے گئے۔ زیارت اور ہرنائی کے درمیان پہاڑی علاقے میں کارروائی کے دوران فورسز نے دہشت گردوں کے ایک ٹھکانے کو نشانہ بنایا، جہاں 8 دہشت گرد ہلاک ہوئے۔

ذرائع کے مطابق کارروائی کے دوران دہشت گردوں کا ٹھکانہ بھی تباہ کر دیا گیا، جبکہ ضلع سوراب کے علاقے حاجیکہ میں ایک اور آپریشن کے دوران ایک دہشت گرد مارا گیا۔

سیکیورٹی فورسز نے دشت کٹائی اور حاجیکہ کے درمیان ناکہ بندی کرکے دہشت گردوں کی نقل و حرکت پر نظر رکھی۔ کارروائیوں کے دوران ہلاک دہشت گردوں کے قبضے سے اسلحہ، گولہ بارود، میگزین، دستی بم، واکی ٹاکی، موٹرسائیکل اور دیگر سامان برآمد کیا گیا۔

وفاقی وزیر داخلہ محسن نقوی نے بلوچستان میں کامیاب کارروائی پر سیکیورٹی فورسز کو خراج تحسین پیش کرتے ہوئے کہا کہ دہشت گردی کے خلاف جنگ میں فورسز کی قربانیاں اور پیشہ ورانہ صلاحیتیں قابلِ فخر ہیں۔