بجلی صارفین کیلیے بُری خبر؛ 41 ارب روپے کا اضافی بوجھ پڑنے کا امکان

اسلام آباد: بجلی صارفین کے لیے ایک اور اضافہ متوقع ہے، سینٹرل پاور پرچیزنگ ایجنسی (سی پی پی اے) نے جولائی کی فیول پرائس ایڈجسٹمنٹ کی مد میں بجلی 2 روپے 52 پیسے فی یونٹ مہنگی کرنے کی درخواست نیپرا میں جمع کرا دی ہے۔

نیپرا کے مطابق درخواست پر سماعت 27 اگست کو ہوگی۔ اگر اضافہ منظور کیا گیا تو صارفین پر جی ایس ٹی سمیت تقریباً 41 ارب روپے کا اضافی مالی بوجھ پڑے گا۔

سی پی پی اے کی درخواست میں جولائی کے دوران بجلی پیدا کرنے کے اخراجات کی تفصیلات شامل کی گئی ہیں۔ رپورٹ کے مطابق درآمدی ایل این جی سے پیدا ہونے والی بجلی کی لاگت 47 روپے 37 پیسے فی یونٹ رہی، جبکہ فرنس آئل، ڈیزل اور دیگر ذرائع سے بجلی کی پیداوار بھی مہنگی رہی۔

جولائی میں بجلی کی پیداوار میں پن بجلی کا حصہ 39.81 فیصد، مقامی کوئلے کا 10.91 فیصد اور درآمدی کوئلے کا حصہ 14.38 فیصد رہا۔ نیپرا تمام اعداد و شمار کا جائزہ لینے کے بعد 27 اگست کو حتمی فیصلہ کرے گا۔