مین ایئرپورٹ روڈ پر یوٹرن کٹ کی بندش سے شہریوں کی مشکلات بڑھ گئیں، جے یو آئی شیخ ماندہ

جمعیت علماء اسلام حلقہ شیخ ماندہ عصمت اللہ شہید یونٹ کے امیر مولانا محمد صادق، سیکرٹری جنرل سید امان اللہ آغا، قاری زین الدین، مولوی محمد نبی، مولانا الطاف شاہ اور دیگر نے مین ایئرپورٹ روڈ پر ٹریفک کے لیے بنائے گئے یوٹرن کٹ کی بندش پر تشویش اظہار کرتے ہوئے کہا ہے کہ انتظامیہ کی جانب سے یوٹرن کٹ بند کیے جانے کے باعث شہریوں کو آمدورفت میں شدید مشکلات کا سامنا ہے۔ انہوں نے کہا کہ یوٹرن کٹ کی بندش کے نتیجے میں علاقہ مکینوں اور دیگر شہریوں کو طویل فاصلہ طے کرکے دور واقع یوٹرن سے واپس آنا پڑتا ہے جس سے نہ صرف شہریوں کا قیمتی وقت اور ایندھن ضائع ہوتا ہے بلکہ ٹریفک کے دباؤ میں بھی اضافہ ہورہا ہے۔ بالخصوص مین ایئرپورٹ روڈ سے ملحقہ آبادیوں کے رہائشی اس غیر ضروری اور غیر موزوں انتظامی اقدام سے براہِ راست متاثر ہورہے ہیں۔ انہوں نے کہا کہ ایسے اقدامات سے گریز کیا جائے جن سے شہریوں کے مسائل میں مزید اضافہ ہو۔ انہوں نے ضلعی انتظامیہ اور متعلقہ حکام سے مطالبہ کیا کہ مین ایئرپورٹ روڈ پر کاروان پٹرول پمپ کے ساتھ واقع یوٹرن کٹ کو فوری طور پر کھولا جائے تاکہ شہریوں کو درپیش مشکلات کا ازالہ اور ٹریفک کی روانی کو بہتر بنایا جاسکے۔