وزیراعلیٰ بلوچستان میر سرفراز بگٹی کا ہنگو آپریشن میں کامیابی پر سیکیورٹی فورسز کو خراجِ تحسین


کوئٹہ: وزیراعلیٰ بلوچستان میر سرفراز بگٹی نے ہنگو میں کامیاب انٹیلی جنس بیسڈ آپریشن پر سیکیورٹی فورسز کو خراجِ تحسین پیش کرتے ہوئے فتنۃ الخوارج کے 7 دہشت گردوں کو ہلاک کرنے پر اہلکاروں کو سلام پیش کیا ہے۔

میر سرفراز بگٹی نے کہا کہ آپریشن کے دوران بہادری سے مقابلہ کرتے ہوئے شہید ہونے والے کیپٹن حمزہ اکرم کی قربانی کو خراجِ عقیدت پیش کرتے ہیں۔ دہشت گردی کے خلاف جنگ میں سیکیورٹی فورسز کی قربانیاں پوری قوم کے لیے باعثِ فخر ہیں، جبکہ شہداء کی قربانیاں رائیگاں نہیں جائیں گی۔

وزیراعلیٰ بلوچستان نے کہا کہ دہشت گرد عناصر اور ان کے سہولت کاروں کے لیے پاکستان میں کوئی جگہ نہیں، ریاست کی رٹ کو چیلنج کرنے والوں کے خلاف کارروائیاں جاری رہیں گی۔

انہوں نے کہا کہ پوری قوم دہشت گردی کے خلاف جنگ میں پاک فوج اور سیکیورٹی فورسز کے ساتھ کھڑی ہے، اور شہداء کی قربانیوں کے باعث ملک میں امن و استحکام کی منزل حاصل ہوگی۔

میر سرفراز بگٹی نے دعا کی کہ اللہ تعالیٰ شہید کیپٹن حمزہ اکرم سمیت تمام شہداء کے درجات بلند فرمائے اور لواحقین کو صبرِ جمیل عطا کرے۔