پیٹرولیم مصنوعات کی قیمتوں میں آج بڑی کمی کا امکان

اسلام آباد: عالمی منڈی میں خام تیل کی قیمتوں میں کمی کے باعث پاکستان میں پیٹرولیم مصنوعات سستی ہونے کا امکان ہے۔

عالمی مارکیٹ میں خام تیل کی قیمتوں میں تقریباً 5 فیصد کمی ریکارڈ کی گئی، جس کے بعد اوگرا آج نئی قیمتوں کا تعین کرے گا۔

ذرائع کے مطابق عالمی قیمتوں کے تناسب سے ملک میں پیٹرول اور ڈیزل کی قیمتوں میں نمایاں کمی متوقع ہے۔

واضح رہے کہ گزشتہ ایک ہفتے کے دوران پیٹرولیم مصنوعات کی قیمتوں میں ریکارڈ اضافہ ہوا، جس میں پیٹرول کی قیمت میں تقریباً 24 روپے جبکہ ڈیزل میں 60 روپے سے زائد اضافہ کیا گیا تھا۔

حکومت نے قیمتوں میں اضافے کی وجہ عالمی مارکیٹ میں خام تیل کی قیمتوں اور درآمدی لاگت میں اضافے کو قرار دیا تھا۔

دوسری جانب آئل مارکیٹنگ کمپنیوں نے روزانہ بنیادوں پر قیمتوں میں ردوبدل کے مجوزہ نظام پر تحفظات کا اظہار کرتے ہوئے کہا ہے کہ اس سے کاروباری منصوبہ بندی اور سپلائی چین متاثر ہو سکتی ہے۔