جنوبی وزیرستان میں چیک پوسٹ پر حملے کی کوشش ناکام، فورسز کی کارروائی میں خودکش سمیت 4 خوارج ہلاک

جنوبی وزیرستان: خیبرپختونخوا کے ضلع جنوبی وزیرستان میں سیکیورٹی فورسز نے چیک پوسٹ پر دہشت گرد حملے کی کوشش ناکام بنا دی، کارروائی کے دوران خودکش بمبار سمیت چار مبینہ دہشت گرد ہلاک ہوگئے۔

پاک فوج کے شعبہ تعلقات عامہ (آئی ایس پی آر) کے مطابق فتنہ الخوارج سے تعلق رکھنے والے دہشت گردوں نے سیکیورٹی چیک پوسٹ کو نشانہ بنانے کی کوشش کی۔ حملہ آور دھماکا خیز مواد سے بھری گاڑی کے ذریعے چیک پوسٹ کی سیکیورٹی توڑنے کی کوشش کر رہے تھے۔

آئی ایس پی آر کے مطابق سیکیورٹی فورسز نے بروقت کارروائی کرتے ہوئے دھماکا خیز مواد سے بھری گاڑی کو چیک پوسٹ سے باہر ہی نشانہ بنا کر تباہ کر دیا، جس کے نتیجے میں خودکش بمبار ہلاک ہوگیا اور چیک پوسٹ محفوظ رہی۔

بیان کے مطابق باقی تین دہشت گرد قریبی عمارت میں چھپ گئے تھے، جنہیں کلیئرنس آپریشن کے دوران ہلاک کر دیا گیا۔ کارروائی میں سیکیورٹی فورسز کا کوئی جانی نقصان نہیں ہوا۔

آئی ایس پی آر کے مطابق علاقے میں مزید دہشت گردوں کی موجودگی کے خدشے کے پیش نظر سرچ اور کلیئرنس آپریشن جاری ہے۔ سیکیورٹی فورسز اور قانون نافذ کرنے والے ادارے ملک سے دہشت گردی کے خاتمے کے لیے کارروائیاں جاری رکھیں گے۔