مستونگ حملہ ناقابلِ برداشت، گورنر بلوچستان کا دہشت گردوں کے خلاف فوری کارروائی کا حکم

کوئٹہ: گورنر بلوچستان جعفر خان مندوخیل نے مستونگ قومی شاہراہ پر فائرنگ کے واقعے میں سیشن جج عبدالحکیم کاکڑ اور ان کے گن مین کی شہادت پر گہرے دکھ اور افسوس کا اظہار کیا ہے۔

گورنر بلوچستان نے واقعے کی مذمت کرتے ہوئے تمام قانون نافذ کرنے والے اداروں کو ہدایت کی ہے کہ ملوث دہشت گرد عناصر کے خلاف فوری اور سخت کارروائی کی جائے، ملزمان کو جلد گرفتار کر کے قانون کے کٹہرے میں لایا جائے۔

انہوں نے متعلقہ حکام کو زخمیوں، جن میں جوڈیشل مجسٹریٹ طارق لاشاری اور ایک اور شخص شامل ہیں، کو بہترین طبی سہولیات فراہم کرنے کی ہدایت بھی کی۔

جعفر خان مندوخیل نے شہداء کے درجات کی بلندی اور زخمیوں کی جلد صحت یابی کے لیے دعا کرتے ہوئے کہا کہ امن دشمن عناصر کے خلاف کارروائیاں جاری رکھی جائیں گی۔