قلات ڈویژن کے خاتمے کے خلاف نواب اسلم رئیسانی ہائیکورٹ پہنچ گئے

کوئٹہ: بلوچستان اسمبلی کے رکن نواب اسلم رئیسانی نے قلات ڈویژن کے خاتمے اور مستونگ کو کوئٹہ ڈویژن میں شامل کرنے کے حکومتی فیصلے کے خلاف بلوچستان ہائیکورٹ میں آئینی درخواست دائر کر دی۔

درخواست میں حکومت بلوچستان کو فریق بنایا گیا ہے۔ نواب اسلم رئیسانی کے وکیل ریاض احمد ایڈووکیٹ نے مؤقف اختیار کیا کہ ملک میں 1973 کا آئین نافذ ہے جو شہریوں کو بنیادی حقوق فراہم کرتا ہے، تاہم حکومت نے مستونگ اور قلات کے عوام کو سنے بغیر نوٹیفکیشن جاری کر دیا۔

ریاض احمد ایڈووکیٹ کا کہنا تھا کہ انتظامی فیصلوں میں عوامی نمائندوں کو اعتماد میں لینا ضروری ہے، جبکہ سراوان اور جھالاوان کے عوام کو سنے بغیر فیصلہ کیا گیا۔

نواب اسلم رئیسانی نے کہا کہ قلات ڈویژن کی تاریخی حیثیت ختم کرنا بنیادی حقوق کی خلاف ورزی ہے، جبکہ حکومت کسی بھی ترقیاتی منصوبے، الاٹمنٹ یا اراضی کی خریداری میں قبائل کو نظر انداز نہیں کر سکتی۔

انہوں نے کہا کہ بلوچستان کا مسئلہ صرف انتظامی نہیں بلکہ سیاسی نوعیت کا ہے، اور حالات کی بہتری کے لیے نئے عمرانی معاہدے کی ضرورت ہے۔ ان کا کہنا تھا کہ صرف وزرائے اعلیٰ کی تبدیلی سے مسائل حل نہیں ہوں گے بلکہ حکمرانوں کو اپنی پالیسیوں میں تبدیلی لانا ہوگی۔

نواب اسلم رئیسانی نے مزید کہا کہ درخواست 1973 کے آئین کی بنیاد پر دائر کی گئی ہے اور عوامی حقوق کے تحفظ کے لیے قانونی راستہ اختیار کیا گیا ہے۔