کشمیریوں نے جانوں کے نذرانے دیے تو ہمیں گھر بیٹھے آزادی ملی، وزیر دفاع

سیالکوٹ: وفاقی وزیر دفاع خواجہ آصف نے کہا ہے کہ وہ بنیادی طور پر کشمیری ہیں، تاہم جن کشمیریوں نے آزادی کے لیے جانوں کے نذرانے پیش کیے، وہ ان کی قربانیوں کے برابر نہیں ہو سکتے۔

آزاد کشمیر کی مہاجرین نشست ایل اے 36 جموں 3 کے انتخابی جلسے سے خطاب کرتے ہوئے خواجہ آصف نے کہا کہ کشمیری مہاجرین کی قربانیاں اور خدمات انتہائی قابلِ قدر ہیں، لیکن آج کے انتخابات میں پاکستان اور کشمیر کے لازوال رشتے کو چیلنج کیا جا رہا ہے۔

انہوں نے کہا کہ وہ بچپن سے آزاد کشمیر کے انتخابات دیکھتے آئے ہیں، مگر موجودہ حالات میں ہونے والے انتخابات کی نوعیت ماضی سے مختلف ہے۔ ان کے بقول وہ اس حوالے سے اسمبلی اور مختلف عوامی فورمز پر بھی اپنے خیالات کا اظہار کر چکے ہیں۔

وزیر دفاع نے کہا کہ وادیٔ کشمیر میں پاکستان کا پرچم اٹھانے اور پاکستان کے حق میں نعرے لگانے والے کشمیریوں کی جدوجہد قابلِ احترام ہے، جبکہ آزادی کے لیے جانوں کا نذرانہ پیش کرنے والوں کا مقام سب سے بلند ہے۔

خواجہ آصف نے مزید کہا کہ “جنہوں نے اپنے خون کا نذرانہ پیش کیا، انہی کی قربانیوں کی بدولت ہمیں گھر بیٹھے آزادی نصیب ہوئی۔” انہوں نے کہا کہ شہدائے کشمیر کی قربانیاں ہمیشہ یاد رکھی جائیں گی اور ان کی جدوجہد کو فراموش نہیں کیا جا سکتا۔