نوڈیرو میں ڈکیتی کی کوشش ناکام، مزاحمت پر ایک شخص قتل، دو بھائی زخمی

نوڈیرو: گڑھی خدا بخش بھٹو تھانے کی حدود میں گاؤں چانڈیو پتافی کے قریب ڈکیتی کے دوران مزاحمت پر مسلح ڈاکوؤں کی فائرنگ سے ایک شخص جاں بحق جبکہ دو افراد زخمی ہو گئے۔

پولیس کے مطابق تین بھائی موٹر سائیکل پر جا رہے تھے کہ راستے میں نامعلوم مسلح افراد نے انہیں روک کر لوٹنے کی کوشش کی۔ مزاحمت کرنے پر ڈاکوؤں نے فائرنگ کر دی، جس کے نتیجے میں تینوں بھائی زخمی ہو گئے۔

زخمیوں کو فوری طور پر اسپتال منتقل کیا گیا، تاہم نسیم ولد امداد پتافی شدید زخموں کی تاب نہ لاتے ہوئے لاڑکانہ اسپتال میں دم توڑ گئے، جبکہ حنیف پتافی اور طاہر پتافی زیر علاج ہیں۔

بعد ازاں مقتول کی لاش گورنمنٹ اسپتال نوڈیرو میں پوسٹ مارٹم کے بعد ورثا کے حوالے کر دی گئی۔ پولیس نے جائے وقوعہ سے شواہد اکٹھے کرکے مقدمے کی کارروائی شروع کر دی ہے اور ملزمان کی تلاش جاری ہے۔