سانحہ زیارت کے خلاف کوئٹہ دھرنا چھٹے روز بھی جاری، اپوزیشن رہنماؤں کے آج خطابات

کوئٹہ: سانحہ زیارت کے خلاف کوئٹہ میں جاری احتجاجی دھرنا آج چھٹے روز بھی جاری رہا۔ دھرنے میں لواحقین کے علاوہ مختلف سیاسی و مذہبی جماعتوں کے رہنما اور کارکن بڑی تعداد میں شریک ہیں۔

دھرنا کمیٹی کے مطابق آج شام 7 بجے اپوزیشن لیڈر محمود خان اچکزئی دھرنے کے شرکاء سے خطاب کریں گے، جبکہ سابق رکن قومی اسمبلی محسن داوڑ رات 8 بجے اظہارِ خیال کریں گے۔ اس کے بعد رات ساڑھے 8 بجے رکن قومی اسمبلی خوشحال خان کاکڑ اور جمعیت علمائے اسلام کے رہنما مولانا عبدالواسع بھی شرکاء سے خطاب کریں گے۔

دھرنا کمیٹی کا کہنا ہے کہ حکومتی وفد اور کمیٹی کے درمیان اب تک مذاکرات کے تین دور ہو چکے ہیں، تاہم کوئی حتمی پیش رفت نہیں ہو سکی۔ حکومتی وفد نے مزید مشاورت کے لیے وقت مانگا ہے اور امکان ہے کہ آج یا کل مذاکرات کا ایک اور دور ہوگا۔

دھرنا کمیٹی نے بتایا کہ آل پارٹیز کی اپیل پر کل گوادر، چمن اور دیگر شہروں میں احتجاجی مظاہرے کیے جائیں گے، جبکہ جمعرات کو کوئٹہ کے دھرنے میں خواتین اور بچوں کی بھی شرکت متوقع ہے۔

کمیٹی کے مطابق آل پارٹیز کے فیصلے کے تحت جمعہ کے روز بلوچستان بھر میں شٹر ڈاؤن ہڑتال بھی کی جائے گی۔