ڈاکٹر حماد نے ڈاکٹر مسعود کے ہمراہ رورل ہیلتھ سینٹر عمرزئی کا تفصیلی دورہ کیا

ڈاکٹر حماد نے ڈاکٹر مسعود کے ہمراہ رورل ہیلتھ سینٹر عمرزئی کا تفصیلی دورہ کیا

دورے کے دوران ادویات کی دستیابی کا جائزہ لیا گیا اور ضرورت کے مطابق مطلوبہ ادویات فراہم کی گئیں۔

چارسدہ(نمائندہ خصوصی)گلوبل ٹائمز میڈیا یورپ کے مطابق ہیلتھ ڈیپارٹمنٹ کی جاری کردہ ہدایات اور پالیسی کے مطابق آج ڈسٹرکٹ ہیلتھ آفیسر (DHO) چارسدہ ڈاکٹر حماد نے ڈاکٹر مسعود کے ہمراہ رورل ہیلتھ سینٹر عمرزئی (RHC Umarzai) کا تفصیلی دورہ کیا۔ دورے کا مقصد ادارے میں فراہم کی جانے والی طبی سہولیات، انتظامی امور، ادویات کی دستیابی، صفائی کی صورتحال، ریکارڈ کی تکمیل اور مریضوں کو فراہم کی جانے والی خدمات کا جامع جائزہ لینا تھا۔دورے کے دوران او پی ڈی، ایمرجنسی، لیبر روم، فارمیسی، لیبارٹری، ویکسینیشن سیکشن، سٹور اور دیگر متعلقہ شعبہ جات کا تفصیلی معائنہ کیا گیا۔ اس موقع پر طبی آلات، ضروری ادویات کے ذخیرے، ریکارڈ رجسٹرز، صفائی کے انتظامات اور عملے کی حاضری کا بغور جائزہ لیا گیا۔ جن شعبوں میں مزید بہتری کی ضرورت محسوس ہوئی، ان کے حوالے سے متعلقہ میڈیکل آفیسر اور عملے کو موقع پر ہی ضروری ہدایات جاری کی گئیں اور تاکید کی گئی کہ تمام خدمات محکمانہ ایس او پیز اور مقررہ معیارات کے مطابق فراہم کی جائیں۔دورے کے دوران ادویات کی دستیابی کا بھی جائزہ لیا گیا اور ضرورت کے مطابق مطلوبہ ادویات فراہم کی گئیں تاکہ مریضوں کو علاج معالجے کی سہولیات بلا تعطل میسر رہیں۔ مزید برآں عملے کو ہدایت کی گئی کہ ادویات کے مؤثر اور ذمہ دارانہ استعمال، ریکارڈ کی بروقت تکمیل، صفائی و ستھرائی، انفیکشن پریوینشن اینڈ کنٹرول (IPC) کے اصولوں پر سختی سے عمل درآمد، اور مریضوں کے ساتھ خوش اخلاقی اور پیشہ ورانہ رویہ ہر صورت یقینی بنایا جائے۔آخر میں ڈسٹرکٹ ہیلتھ آفیسر ڈاکٹر حماد نے اس عزم کا اعادہ کیا کہ رورل ہیلتھ سینٹر عمرزئی میں عوام کو معیاری، بروقت اور مؤثر طبی سہولیات کی فراہمی ہر صورت یقینی بنائی جائے گی۔ محکمانہ ہدایات پر مکمل عمل درآمد، مسلسل مانیٹرنگ اور مؤثر فالو اپ کے ذریعے ادارے کی کارکردگی کو مزید بہتر بنایا جائے گا تاکہ عوام کو بہترین طبی خدمات فراہم کی جا سکیں۔