دہشت گردی کے خاتمے اور امن کے قیام کیلئے ہر ممکن اقدامات جاری رہیں گے، وزیراعلیٰ بلوچستان

وزیراعلیٰ بلوچستان نے میر شفیق الرحمان مینگل کی رہائش گاہ پر حملے کی مذمت، دہشت گردوں کی فوری گرفتاری کا حکم

کوئٹہ: وزیراعلیٰ بلوچستان میر سرفراز بگٹی نے خضدار میں ممتاز قبائلی رہنما اور پاکستان پیپلز پارٹی کے ٹکٹ ہولڈر میر شفیق الرحمان مینگل کی رہائش گاہ پر دہشت گردانہ حملے کی شدید مذمت کرتے ہوئے اسے بزدلانہ اور قابلِ مذمت قرار دیا ہے۔

وزیراعلیٰ نے اپنے بیان میں کہا کہ امن دشمن عناصر اپنے مذموم عزائم میں کبھی کامیاب نہیں ہوں گے۔ انہوں نے میر شفیق الرحمان مینگل کی بہادری، جرات اور ثابت قدمی کو سراہتے ہوئے کہا کہ دہشت گردوں کا ڈٹ کر مقابلہ کرنا قومی عزم اور حوصلے کی عکاسی کرتا ہے۔

میر سرفراز بگٹی نے متعلقہ قانون نافذ کرنے والے اداروں کو ہدایت کی کہ حملے میں ملوث تمام دہشت گردوں اور ان کے سہولت کاروں کو فوری طور پر گرفتار کرکے قانون کے مطابق قرار واقعی سزا دی جائے۔

انہوں نے کہا کہ بلوچستان کے عوام، قبائلی عمائدین، سیاسی قیادت اور سیکیورٹی ادارے دہشت گردی کے خلاف متحد ہیں اور امن دشمن عناصر کے تمام مذموم عزائم ہر قیمت پر ناکام بنائے جائیں گے۔