فریال تالپور نے بی آئی ایس پی کی اصلاحات اور سماجی تحفظ کے اقدامات کو سراہا

پاکستان پیپلز پارٹی شعبۂ خواتین کی صدر محترمہ فریال تالپور نے آج بینظیر انکم سپورٹ پروگرام (بی آئی ایس پی) ہیڈکوارٹرز کا دورہ کیا۔ اس موقع پر حکومتِ سندھ کی ترجمان محترمہ سعدیہ جاوید بھی ان کے ہمراہ تھیں۔
چیئرپرسن بی آئی ایس پی سینیٹر روبینہ خالد اور سیکرٹری بی آئی ایس پی عامر علی احمد نے ان کا خیرمقدم کیا۔ سیکرٹری عامر علی احمد نے محترمہ فریال تالپور کو بی آئی ایس پی کی مجموعی پیش رفت، اہم اصلاحات، نئے ڈیجیٹل ادائیگی کے نظام اور پاکستان بھر میں سماجی تحفظ کے نظام کو مزید مؤثر بنانے میں پروگرام کے کردار پر تفصیلی بریفنگ دی۔
انہیں بتایا گیا کہ حکومت نے رواں مالی سال کے لیے بی آئی ایس پی کے لیے 838 ارب روپے مختص کیے ہیں۔ بینظیر کفالت پروگرام کے تحت ایک کروڑ تین لاکھ مستحق خاندانوں کو ہر سہ ماہی 14,500 روپے مالی معاونت فراہم کی جا رہی ہے۔ بینظیر تعلیمی وظائف پروگرام کے ذریعے ایک کروڑ 24 لاکھ بچوں کی تعلیم میں معاونت کی جا رہی ہے، جبکہ بینظیر نشوونما پروگرام کے تحت تقریباً 20 لاکھ خواتین اور بچوں کو غذائی معاونت فراہم کی جا رہی ہے۔
انہیں مزید آگاہ کیا گیا کہ مستحقین کے لیے ادائیگیوں کے نظام میں شفافیت، سہولت اور وقار کو یقینی بنانے کے لیے 97 لاکھ ڈیجیٹل سوشل پروٹیکشن والٹس کھولے جا چکے ہیں، اور موجودہ قسط کی ادائیگیاں انہی ڈیجیٹل والٹس کے ذریعے کی جا رہی ہیں۔
محترمہ فریال تالپور کو بینظیر ہنرمند پروگرام کے بارے میں بھی بریفنگ دی گئی، جس کے تحت بی آئی ایس پی سے مستفید ہونے والے خاندانوں اور ان کے اہلِ خانہ کو مارکیٹ کی ضروریات کے مطابق مفت فنی و پیشہ ورانہ تربیت فراہم کی جا رہی ہے۔
سیکرٹری بی آئی ایس پی نے ورلڈ بینک کی حالیہ تحقیق کے نتائج بھی پیش کیے، جن کے مطابق بی آئی ایس پی ایک کروڑ دو لاکھ سے زائد خاندانوں کی معاونت کر رہا ہے، جو ملک کے تقریباً 24 فیصد گھرانوں پر مشتمل ہیں۔ تحقیق کے مطابق بی آئی ایس پی کے ذریعے دیئے جانے والے ہر ایک روپے کے بدلے گھریلو آمدنی میں 2.34 روپے کا اضافہ ہوتا ہے۔ مزید یہ کہ بی آئی ایس پی کے باعث پیدا ہونے والی معاشی سرگرمیاں 16 لاکھ 60 ہزار ملازمتوں کو سہارا دیتی ہیں اور قومی خزانے میں سالانہ تقریباً 174 ارب روپے کا معاشی فائدہ پہنچاتی ہیں۔
اس موقع پر گفتگو کرتے ہوئے محترمہ فریال تالپور نے بی آئی ایس پی کی شفافیت، خدمات کی فراہمی، مالی شمولیت اور ڈیجیٹل تبدیلی کے لیے کی جانے والی اصلاحات کو سراہا۔ انہوں نے غربت میں کمی، خواتین کو بااختیار بنانے اور انسانی وسائل کی ترقی میں بی آئی ایس پی کے کردار کو قابلِ تحسین قرار دیتے ہوئے اس بات پر زور دیا کہ شفافیت کو مزید مضبوط بنایا جائے، عوامی آگاہی میں اضافہ کیا جائے اور مستحقین کے لیے خدمات تک رسائی کو مزید آسان، مؤثر اور سہل بنایا جائے۔