کوئٹہ میں پیپلز ٹرین چلانے کی تیاریاں مکمل، نئی بوگیوں کا ماڈل تیار

کوئٹہ: سریاب ریلوے اسٹیشن سے کچلاک تک چلنے والی مجوزہ پیپلز ٹرین کے لیے نئی بوگیوں کا ماڈل تیار کر لیا گیا ہے، جبکہ ریلوے حکام کے مطابق جدید بوگیاں جلد کوئٹہ پہنچا دی جائیں گی۔

ذرائع کے مطابق حکومت بلوچستان کے تعاون سے شروع کی جانے والی پیپلز ٹرین سروس کا باقاعدہ افتتاح جلد متوقع ہے، جس کے بعد سریاب ریلوے اسٹیشن سے کچلاک تک مسافروں کو سفری سہولت فراہم کی جائے گی۔

ریلوے حکام کا کہنا ہے کہ نئی بوگیوں کی آمد کے بعد افتتاحی تقریب منعقد کی جائے گی، جس کے بعد پیپلز ٹرین باقاعدہ طور پر عوام کے لیے چلائی جائے گی۔ اس منصوبے سے کوئٹہ اور گردونواح کے شہریوں کو سستی، محفوظ اور معیاری سفری سہولت میسر آئے گی۔