کوئٹہ: ینگ ڈاکٹرز کا ریڈ زون کی جانب مارچ کا اعلان، پولیس متحرک

کوئٹہ: ینگ ڈاکٹرز ایسوسی ایشن نے احتجاجی ریلی نکالنے اور ریڈ زون میں دھرنا دینے کا اعلان کر دیا، جس کے بعد پولیس نے سیکیورٹی انتظامات سخت کرتے ہوئے سول ہسپتال میں اضافی نفری تعینات کر دی ہے۔

ذرائع کے مطابق سول ہسپتال کوئٹہ میں پولیس کی اضافی نفری کے ساتھ قیدی وین بھی طلب کر لی گئی ہے، جبکہ انتظامیہ کی جانب سے ممکنہ صورتحال سے نمٹنے کے لیے اقدامات کیے جا رہے ہیں۔

ینگ ڈاکٹرز نے اعلان کیا ہے کہ وہ ہر صورت ریڈ زون جائیں گے اور اپنے مطالبات کے حق میں احتجاج جاری رکھیں گے۔

دوسری جانب پولیس اور انتظامیہ کی جانب سے صورتحال کو کنٹرول کرنے کے لیے حکمت عملی تیار کی جا رہی ہے، جبکہ حکومتی مؤقف تاحال سامنے نہیں آیا۔