بلوچستان شدید گرمی کی لپیٹ میں، نوکنڈی میں پارہ 47 اور سبی میں 46 ڈگری سینٹی گریڈ تک پہنچ گیا

کوئٹہ: بلوچستان کے بیشتر اضلاع شدید گرمی کی لہر کی زد میں ہیں، جہاں درجہ حرارت میں غیر معمولی اضافے نے معمولاتِ زندگی متاثر کر دیے ہیں۔ محکمہ موسمیات کے مطابق نوکنڈی ملک کے گرم ترین علاقوں میں شامل رہا، جہاں زیادہ سے زیادہ درجہ حرارت 47 ڈگری سینٹی گریڈ ریکارڈ کیا گیا، جبکہ سبی میں پارہ 46 ڈگری تک پہنچ گیا۔

صوبائی دارالحکومت کوئٹہ اور سرحدی شہر چمن میں بھی شدید گرمی برقرار رہی، جہاں درجہ حرارت 42 ڈگری سینٹی گریڈ ریکارڈ کیا گیا۔ گرمی کی شدت کے باعث شہریوں کو سخت مشکلات کا سامنا کرنا پڑا اور دوپہر کے اوقات میں بازاروں اور سڑکوں پر غیر معمولی سناٹا دیکھنے میں آیا۔

ماہرین نے شہریوں کو غیر ضروری طور پر دھوپ میں نکلنے سے گریز، پانی کا زیادہ استعمال کرنے اور احتیاطی تدابیر اختیار کرنے کا مشورہ دیا ہے۔