دہشت گردی کے مکمل خاتمے تک جنگ جاری رہے گی،وزیراعلیٰ بلوچستان

وزیراعلیٰ بلوچستان میر سرفراز بگٹی نے خاران اور مستونگ میں سیکیورٹی فورسز کی جانب سے فتنۃ الہندوستان کے خلاف کی جانے والی دو کامیاب کارروائیوں کو قابلِ تحسین قرار دیتے ہوئے کہا ہے کہ گزشتہ دو روز کے دوران ایک خودکش بمبار سمیت آٹھ دہشت گرد اپنے انجام کو پہنچ چکے ہیں۔

اپنے بیان میں وزیراعلیٰ نے کہا کہ پوری قوم بلوچستان کے امن اور عوام کے جان و مال کے تحفظ کے لیے ہر محاذ پر دشمن کے ناپاک عزائم ناکام بنانے والے بہادر سیکیورٹی اہلکاروں کو سلام پیش کرتی ہے۔ انہوں نے کہا کہ سیکیورٹی فورسز کی پیشہ ورانہ صلاحیت اور قربانیاں ملک کے امن و استحکام کی ضمانت ہیں۔

میر سرفراز بگٹی نے اس عزم کا اعادہ کیا کہ پاکستان کے خلاف غیر ملکی سرپرستی میں ہونے والی دہشت گردی کے مکمل خاتمے تک یہ جنگ پوری قوت، قومی عزم اور ثابت قدمی کے ساتھ جاری رکھی جائے گی۔