عوام کے تحفظ کے لیے مزید اقدامات جاری رکھیں گے، گورنر بلوچستان

کوئٹہ: گورنر بلوچستان جعفر خان مندوخیل نے ڈاکٹر ماہ نور ناصر پر تیزاب حملے کے واقعے پر افسوس کا اظہار کرتے ہوئے کہا ہے کہ حکومت متاثرہ ڈاکٹر اور ان کے اہلِ خانہ کے ساتھ مسلسل رابطے میں ہے اور ہر ممکن تعاون فراہم کیا جا رہا ہے۔

انہوں نے میڈیا سے گفتگو کرتے ہوئے کہا کہ اگر ڈاکٹر ماہ نور کے بہتر علاج کے لیے انہیں بیرونِ ملک منتقل کرنے کی ضرورت پیش آئی تو حکومت تمام اخراجات برداشت کرے گی۔ گورنر نے کہا کہ حکومت ہر ڈاکٹر کو الگ الگ سکیورٹی فراہم نہیں کر سکتی، جبکہ افسوسناک واقعے میں ملوث شخص بھی ہسپتال کا ملازم تھا۔

انہوں نے کہا کہ کسی نے یہ توقع نہیں کی تھی کہ ہسپتال کے اندر موجود شخص ہی اس طرح کا حملہ کرے گا۔ ان کے مطابق حملہ آور اپنے انجام تک پہنچ چکا ہے، تاہم حکومت مستقبل میں ایسے واقعات کی روک تھام اور عوام کے تحفظ کے لیے تمام ضروری اقدامات جاری رکھے گی۔

گورنر بلوچستان نے مزید کہا کہ آئندہ بجٹ عوام دوست ہوگا اور اس میں عوام کو زیادہ سے زیادہ ریلیف دینے کی کوشش کی جائے گی۔