یورپی ممالک جانے کے خواہشمند افراد کیلئے اہم خبر آگئی

بیورو آف ایمیگریشن اینڈ اوورسیز ایمپلائمنٹ نے اعلان کیا ہے کہ یورپی ممالک میں جون 2026 سے نئے پناہ گزین اور مائیگریشن معاہدے کا اطلاق شروع ہو رہا ہے۔ اس اقدام کا مقصد پناہ گزینی کے نظام کو زیادہ تیز، منظم اور مؤثر بنانا ہے۔

نئے فریم ورک کے تحت سرحدوں پر داخلے کی سخت جانچ پڑتال لازمی ہوگی اور پناہ کی درخواستوں کے فیصلے پہلے سے کہیں زیادہ تیزی سے کیے جائیں گے تاکہ غیر قانونی طور پر رہنے والے افراد کی شناخت اور کارروائی جلد مکمل کی جا سکے۔

بیورو کے مطابق اس معاہدے کا ایک اہم حصہ غیر قانونی طور پر یورپی یونین کے باہر سے آنے والے افراد کی ملک بدری کی شرح بڑھانے سے متعلق ہے۔ اس مقصد کے لیے نیا واپسی فریم ورک اور یورپی یونین کی سطح پر محفوظ ممالک کی فہرست مرتب کی گئی ہے۔

اس نظام کے تحت، اگر کوئی فرد قانونی طریقے اختیار نہیں کرتا تو اسے فوری طور پر واپس بھیجا جا سکتا ہے۔