ترقیاتی بجٹ پر حکومت اور اتحادیوں میں اتفاق، بلوچستان کو سب سے زیادہ فنڈز دینے کا فیصلہ

اسلام آباد: وفاقی وزیر منصوبہ بندی احسن اقبال نے کہا ہے کہ پاکستان پیپلزپارٹی اور مسلم لیگ (ن) کے درمیان ترقیاتی بجٹ کے حوالے سے مذاکرات کامیابی سے مکمل ہوگئے ہیں اور پبلک سیکٹر ڈویلپمنٹ پروگرام (پی ایس ڈی پی) پر تمام معاملات طے پا گئے ہیں۔

احسن اقبال کے مطابق آئندہ مالی سال کے وفاقی ترقیاتی بجٹ میں چھوٹے صوبوں کو ترجیح دی جائے گی۔ انہوں نے بتایا کہ بلوچستان کے ترقیاتی منصوبوں کے لیے 265 ارب روپے مختص کیے گئے ہیں، جو تمام صوبوں میں سب سے زیادہ ہیں۔

انہوں نے کہا کہ سندھ کے ترقیاتی منصوبوں کے لیے 195 ارب روپے، خیبرپختونخوا کے لیے 98 ارب روپے جبکہ پنجاب کے لیے 72 ارب روپے رکھے گئے ہیں۔ اس کے علاوہ آزاد کشمیر اور گلگت بلتستان کے ترقیاتی منصوبوں کے لیے 150 ارب روپے مختص کیے گئے ہیں۔

وفاقی وزیر نے اعلان کیا کہ سندھ میں سکھر-حیدرآباد موٹروے منصوبے پر رواں سال کام کا آغاز کیا جائے گا، جبکہ کراچی کے اہم کے فور واٹر سپلائی منصوبے کے لیے بھی وفاقی بجٹ میں فنڈز رکھے جائیں گے۔

احسن اقبال کا کہنا تھا کہ آئندہ بجٹ میں شاہراہوں، نہری نظام اور دیگر اہم ترقیاتی منصوبوں کے لیے بھی خاطر خواہ وسائل مختص کیے گئے ہیں تاکہ ملک بھر میں ترقی کا عمل مزید تیز کیا جا سکے۔