منتخب نمائندوں کو عوامی مسائل کے حل پر توجہ دینی چاہیے، ناصر شاھوانی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کوئٹہ: معروف مصنف و کالم نگار ” ناصر شاھوانی ” نے کہا ہے کہ منتخب نمائندوں کو عوامی مسائل کے حل پر اپنی تمام تر توجہ مرکوز کرنی چاہیے۔کیونکہ عوام کی خوشحالی ہی ملک کی ترقی، استحکام اور مضبوطی کی ضمانت ہے۔ عوام کو بنیادی سہولیات کی فراہمی، روزگار کے مواقع، تعلیم، صحت اور پینے کے صاف پانی کی دستیابی حکومتوں اور عوامی نمائندوں کی اولین ذمہ داری ہے۔ اپنی رہائش گاہ پر مختلف عوامی و سیاسی نمائندوں سے گفتگو کرتے ہوئے ناصر شاھوانی نے کہا کہ عوام نے اپنے نمائندوں کو اس امید کے ساتھ منتخب کیا ہے کہ وہ ان کے مسائل کو ایوانوں میں مؤثر انداز میں اجاگر کریں گے اور ان کے حل کے لیے عملی اقدامات اٹھائیں گے۔بدقسمتی سے کئی علاقوں میں عوام آج بھی بنیادی سہولیات سے محروم ہیں، جن کے ازالے کے لیے سنجیدہ اور مربوط حکمت عملی اختیار کرنے کی ضرورت ہے۔ انہوں نے کہا کہ سیاسی قیادت کو اختلافات اور ذاتی مفادات سے بالاتر ہوکر عوامی خدمت کے جذبے کے تحت کام کرنا چاہیے۔موجودہ حالات اس امر کے متقاضی ہیں کہ تمام منتخب نمائندے اپنے اپنے حلقوں میں عوامی رابطوں کو مزید مضبوط بنائیں اور عوام کو درپیش مشکلات کے فوری حل کے لیے عملی کردار ادا کریں۔ناصر شاھوانی نے کہا کہ عوام کی فلاح و بہبود، نوجوانوں کو روزگار کی فراہمی، ترقیاتی منصوبوں کی بروقت تکمیل اور پسماندہ علاقوں کی ترقی پر خصوصی توجہ دینا وقت کی اہم ضرورت ہے۔ انہوں نے اس عزم کا اظہار کیا کہ عوامی مسائل کے حل اور خطے کی ترقی کے لیے ہر ممکن کردار ادا کرتے رہیں گے اور عوام کی آواز کو ہر فورم پر موثر انداز میں اٹھایا جائے گا۔