ڈپٹی کمشنر کا حب اور لسبیلہ کے ملازمین کی تنخواہوں و تقسیم پر اہم اجلاس منعقد

حب(نمائندہ خصوصی)
ضلع حب اور ضلع لسبیلہ کے ملازمین کی تنخواہوں، ڈی ڈی او کوڈ کی منتقلی اور ملازمین کی تقسیم کار سے متعلق ایک اہم اجلاس ڈپٹی کمشنر حب کی زیر صدارت منعقد ہوا۔ اجلاس میں ضلع حب اور لسبیلہ کے تمام متعلقہ لائن محکموں کے سربراہان نے شرکت کی جبکہ ایڈیشنل ڈپٹی کمشنر جنرل لسبیلہ سراج بلوچ بھی اجلاس میں موجود تھے۔
اجلاس میں ضلع لسبیلہ کی دو اضلاع، حب اور لسبیلہ، میں تقسیم کے بعد ملازمین کی درست تقسیم، ڈی ڈی او کوڈ کی منتقلی اور تنخواہوں کی ادائیگی کے معاملات کا تفصیلی جائزہ لیا گیا۔ شرکاء کو بتایا گیا کہ تاحال کئی ملازمین کی تنخواہوں اور ریکارڈ کی منتقلی کا عمل مکمل نہیں ہو سکا جس کے باعث انتظامی امور میں مشکلات پیش آ رہی ہیں۔
یہ اس سلسلے کا دوسرا اہم اجلاس تھا جس میں تمام متعلقہ محکموں اور دونوں اضلاع کے ٹریژری افسران کو اجلاس میں کیے گئے فیصلوں پر فوری عملدرآمد یقینی بنانے کی ہدایات جاری کی گئیں تاکہ ملازمین کو درپیش مسائل جلد از جلد حل کیے جا سکیں۔