شہداء کی مائیں پوری قوم کا فخر ہیں،وزیراعلیٰ بلوچستان

کوئٹہ: مدرز ڈے کے موقع پر وزیراعلیٰ بلوچستان میر سرفراز بگٹی نے اپنے خصوصی پیغام میں کہا ہے کہ ماں صرف ایک رشتہ نہیں بلکہ محبت، قربانی، صبر اور دعا کا وہ مقدس سایہ ہے جس کے بغیر زندگی ادھوری ہے۔ انہوں نے دنیا بھر کی ماؤں خصوصاً پاکستان اور بلوچستان کی عظیم ماؤں کو خراجِ تحسین پیش کرتے ہوئے کہا کہ ماؤں نے اپنی تربیت، دعاؤں اور قربانیوں سے بہترین نسلوں کی پرورش کی۔
وزیراعلیٰ بلوچستان کا کہنا تھا کہ ماؤں نے نئی نسل کو وطنِ عزیز پاکستان سے محبت، وفاداری اور خدمت کا جذبہ منتقل کیا ہے، جبکہ شہداء کی مائیں پوری قوم کا فخر ہیں اور ان کی قربانیاں قومی تاریخ کا روشن باب ہیں۔ میر سرفراز بگٹی نے مزید کہا کہ ماں کا احترام ہماری تہذیب، ایمان اور پاکستانیت کی بنیاد ہے۔