عوامی وسائل صرف عوام کی امانت ہیں، ذاتی مراعات قابل قبول نہیں، شاہد رند

معاون وزیر اعلیٰ بلوچستان شاہد رند نے واضح کیا ہے کہ چیف سیکرٹری کے عہدے سے ریٹائرمنٹ کے بعد اضافی مراعات سے متعلق نوٹیفکیشن سابق دورِ حکومت میں جاری کیا گیا تھا، جس سے موجودہ صوبائی حکومت اصولی طور پر اتفاق نہیں رکھتی۔ انہوں نے کہا کہ بلوچستان ہائی کورٹ کے فیصلے کے خلاف اپیل بھی سابق حکومت کی جانب سے دائر کی گئی تھی۔

شاہد رند کا کہنا تھا کہ موجودہ حکومت نے نہ تو اس نوٹیفکیشن کا دفاع کیا ہے اور نہ ہی کسی مرحلے پر اس کے حق میں اپیل دائر کی ہے۔ انہوں نے دو ٹوک مؤقف اختیار کرتے ہوئے کہا کہ عوامی وسائل کی ایک ایک پائی عوام کی امانت ہے، جسے صرف عوامی فلاح و بہبود پر خرچ ہونا چاہیے۔

انہوں نے مزید کہا کہ وفاقی سول سروسز میں مراعات کے لیے ایک باقاعدہ مالی چارٹ موجود ہے، جبکہ بلوچستان میں بھی مراعات کا ایک طے شدہ شیڈول نافذ ہے۔ موجودہ صوبائی حکومت اس متنازع نوٹیفکیشن اور اضافی مراعات کی کسی صورت حمایت نہیں کرتی۔