پبلک ٹرانسپورٹ کے کرایوں میں کوئی اضافہ نہیں کیا جائےگا، وزیراعلیٰ سندھ

وزیراعلیٰ سندھ مراد علی شاہ نے واضح کیا ہے کہ صوبے میں پبلک ٹرانسپورٹ کے کرایوں میں کسی قسم کا اضافہ نہیں کیا جائے گا۔

کراچی میں میڈیا سے گفتگو کرتے ہوئے انہوں نے بتایا کہ دو روز قبل ہی ہدایات جاری کردی گئی تھیں کہ کرائے نہ بڑھائے جائیں، جس کے بعد محکمہ ٹرانسپورٹ نے ٹرانسپورٹرز اور متعلقہ حکام سے مشاورت کی۔

ان کے مطابق ٹرانسپورٹرز نے حکومت کے ساتھ تعاون پر آمادگی ظاہر کی ہے اور یہ طے پایا ہے کہ 28 فروری کے مقررہ کرائے ہی برقرار رہیں گے۔

مراد علی شاہ نے کہاکہ حکومت ٹرانسپورٹرز کے اضافی اخراجات برداشت کرے گی، جبکہ رجسٹرڈ بسوں کے لیے فی بس ایک لاکھ روپے کی رقم وفاق کی جانب سے صوبے کو فراہم کی جا رہی ہے۔

انہوں نے مزید بتایا کہ اس وقت صوبے میں 470 سرکاری بسیں جبکہ مجموعی طور پر تقریباً 11 ہزار بسیں چل رہی ہیں، اور ان اقدامات کا مقصد عوام کو ریلیف فراہم کرنا ہے۔

وزیراعلیٰ نے خبردار کیاکہ غیر رجسٹرڈ ٹرانسپورٹرز اگر من مانی کرتے ہوئے کرائے بڑھائیں گے تو ان کے خلاف سخت کارروائی کی جائے گی، اور انہیں ہدایت دی گئی ہے کہ جلد از جلد رجسٹریشن کروا کر سبسڈی سے فائدہ اٹھائیں۔

ان کا کہنا تھا کہ ہدف کے تحت دی جانے والی سبسڈی زیادہ مؤثر ہوتی ہے کیونکہ اس کا براہِ راست فائدہ مستحق افراد تک پہنچتا ہے۔

انہوں نے یہ بھی کہاکہ آن لائن کھانے یا سفری سہولیات استعمال کرنے والے افراد عموماً بہتر مالی حیثیت رکھتے ہیں اور ان خدمات کی لاگت بھی وہی برداشت کرتے ہیں۔