میر ضیاءاللہ لانگو اور ملک حسن کاکڑ کا تنازع خوش اسلوبی سے حل

صوبائی وزیر داخلہ میر ضیاءاللہ لانگو اور ملک محمد ہاشم خان کاکڑ کے صاحبزادے ملک حسن کاکڑ کے درمیان جاری تنازعہ خوش اسلوبی سے حل ہو گیا، جس کے بعد دونوں فریقین میں صلح صفائی ہو گئی اور تعلقات خوشگوار ہو گئے۔تفصیلات کے مطابق سینئر سیاستدان و سابق سینیٹر نوابزادہ حاجی لشکری خان رئیسانی کی سربراہی میں ثالثین کے ایک جرگہ نے اہم کردار ادا کیا۔ جرگہ میں میر کبیر محمد شہی، میر عارف جان محمد حسنی، سید امرالدین آغا، رشید خان ناصر، سردار یحییٰ خان ناصر، ملک نصیر احمد شاہوانی، نصیب اللہ خان بازئی، حاجی عطاءمحمد بنگلزئی، حاجی رزاق مشوانی، ٹکری عبدالحمید بنگلزئی، نذیر بوستانی، دلبر خان، بشیر احمد بنگلزئی، خیر جان بلوچ اور نصیب اللہ کلیوال سمیت دیگر معززین شامل تھے۔جرگہ اراکین کی کاوشوں سے میر ضیاءاللہ لانگو اور ملک محمد ہاشم خان کاکڑ کے درمیان جاری تنازعہ افہام و تفہیم سے طے پا گیا، جس کے نتیجے میں دونوں فریقین نے ایک دوسرے کو گلے لگا کر اختلافات ختم کرنے کا اعلان کیا۔ثالثین نے اس موقع پر اس امید کا اظہار کیا کہ یہ صلح علاقے میں بھائی چارے، امن اور استحکام کے فروغ میں مثبت کردار ادا کرے گی۔