تمام صحت مراکز میں عوام کو معیاری اور فوری طبی سہولیات کی فراہمی یقینی بنائی جائے،حسیب شجاع

تمام صحت مراکز میں عوام کو معیاری اور فوری طبی سہولیات کی فراہمی یقینی بنائی جائے،حسیب شجاع
غفلت اور غیر حاضری کسی صورت برداشت نہیں کی جائے گی،حسیب شجاع
لورالائی(میاں محمدعامربشیر آرائیں )ڈپٹی کمشنر لورالائی کیپٹن ریٹائرڈ محمد حسیب شجاع کے زیر صدارت ڈسٹرکٹ ہیلتھ کمیٹی کا ایک جائزہ اجلاس منعقد ہوا، جس میں ایڈیشنل ڈپٹی کمشنر ریونیو محمد اسماعیل مینگل ،محکمہ صحت سے وابستہ متعلقہ افسران، ڈسٹرکٹ ہیلتھ آفیسر محمد مقبول احمد ہسپتال کے میڈیکل سپرنٹنڈنٹ (MS) محمدانورمندوخیل، خزانہ آفیسر محمد زبیر اور پی پی ایچ آئی (PPHI) ڈاکٹر فرحان کاکڑ نے شرکت کی۔اجلاس کے دوران ضلع بھر میں قائم بنیادی مراکز صحت (BHUs)، دیہی مراکز صحت (RHCs) اور سرکاری ہسپتالوں کی مجموعی کارکردگی کا تفصیلی جائزہ لیا گیا۔ متعلقہ حکام کی جانب سے صحت کے مراکز میں دستیاب سہولیات، ادویات کی فراہمی، طبی آلات کی حالت، مریضوں کو دی جانے والی سہولیات اور درپیش مسائل کے حوالے سے جامع رپورٹس پیش کی گئیں۔اجلاس میں خاص طور پر ادویات کی بلا تعطل فراہمی، ڈاکٹرز اور طبی عملے کی حاضری، صفائی ستھرائی کے انتظامات اور مریضوں کو بروقت علاج کی سہولیات کی فراہمی پر زور دیا گیا۔ اس موقع پر بعض مراکز میں عملے کی غیر حاضری اور سہولیات کے فقدان پر تشویش کا اظہار بھی کیا گیا۔ ڈپٹی کمشنر لورالائی کیپٹن ریٹائرڈ محمد حسیب شجاع نے اجلاس سے خطاب کرتے ہوئے ہدایت کی کہ تمام صحت مراکز میں عوام کو معیاری اور فوری طبی سہولیات کی فراہمی کو یقینی بنایا جائے۔ انہوں نے واضح کیا کہ فرائض میں غفلت اور غیر حاضری کسی صورت برداشت نہیں کی جائے گی اور ایسے عملے کے خلاف سخت کارروائی عمل میں لائی جائے گی۔انہوں نے مزید کہا کہ صحت کے شعبے میں بہتری حکومت کی اولین ترجیحات میں شامل ہے، لہٰذا تمام متعلقہ افسران اپنی ذمہ داریاں احسن طریقے سے سرانجام دیں اور عوامی شکایات کے ازالے کے لیے فوری اقدامات کریں۔ اجلاس کے اختتام پر مختلف امور پر عملدرآمد کے لیے متعلقہ حکام کو ہدایات جاری کی گئیں تاکہ عوام کو بہتر اور بروقت طبی سہولیات فراہم کی جا سکیں۔

Browse Posts

تبادلے معطلیاں اور پولیس کا ناٹک

لورالائی میں طالبات کیلئے جدید ہیلتھ کیئر سینٹر کا قیام

سیاسی رکاوٹوں کے باوجود ترقیاتی سفر جاری رہے گا، حاجی محمد خان طوراوتمانخیل