چمن اور گرد و نواح میں زلزلے کے جھٹکے، شدت 3.1 ریکارڈ، شہریوں میں خوف و ہراس

زلزلے کا مرکز چمن سے 120 کلومیٹر جنوب مغرب میں تھا، جانی و مالی نقصان کی اطلاع موصول نہیں ہوئی، ضلعی انتظامیہ
بلوچستان کے سرحدی ضلع چمن اور اس کے گرد و نواح میں زلزلے کے جھٹکے محسوس کیے گئے ہیں، جس کے باعث پورے علاقے میں شدید خوف و ہراس پھیل گیا۔ زلزلہ پیما مرکز کے مطابق زلزلے کی شدت ریکٹر اسکیل پر 3.1 ریکارڈ کی گئی، جبکہ اس کی گہرائی زیرِ زمین 14 کلومیٹر تھی۔ زلزلے کا مرکز چمن شہر سے تقریبا 120 کلومیٹر جنوب مغرب میں واقع تھا۔ جھٹکے محسوس ہوتے ہی شہری کلمہ طیبہ کا ورد کرتے ہوئے اپنے گھروں، دکانوں اور دیگر عمارتوں سے کھلے مقامات کی جانب نکل آئے۔زلزلے کے فورا بعد ضلعی انتظامیہ اور ریسکیو ٹیمیں الرٹ ہوگئیں، تاہم ابتدائی اطلاعات کے مطابق اب تک کسی قسم کے جانی یا مالی نقصان کی کوئی اطلاع موصول نہیں ہوئی ہے۔ انتظامیہ کا کہنا ہے کہ وہ صورتحال پر نظر رکھے ہوئے ہیں اور متاثرہ علاقوں سے معلومات حاصل کی جا رہی ہیں۔ ماہرین کا کہنا ہے کہ کم شدت کے ان جھٹکوں سے گھبرانے کی ضرورت نہیں، تاہم احتیاطی تدابیر اختیار کرنا ضروری ہے۔