کیا حالیہ دنوں میں پاکستان نے افغانستان کے کچھ علاقے پر قبضہ کر لیا ہے؟

ڈیورینڈ لائن کہلانے والی پاکستان افغان سرحد پر پکتیکا صوبے میں حال ہی میں ایک واقعہ پیش آیا ہے، جس سے قیاس آرائیاں پیدا ہوئی ہیں کہ پاکستان نے افغانستان کے کم از کم 12 کلومیٹر علاقے کو باڑ لگا کر ضم کر لیا ہے۔

تاہم طالبان کی وزارت دفاع کا کہنا ہے کہ افغانستان کے سرحدی علاقے حکومت کی سکیورٹی فورسز کے کنٹرول میں ہیں اور اس نے کسی بھی پاکستانی پیش قدمی کی تردید کی ہے۔

سوشل میڈیا ویب سائٹ ایکس پر اس ہفتے پاکستانی اکاؤنٹس پر ایک ویڈیو گردش کرتی رہی جس کا عنوان تھا ’پاکستان کا نقشہ پھیل رہا ہے۔‘

ویڈیو میں پاکستانی باڑ والے سرحدی مقامات کی تصاویر دکھا کر لکھا گیا ہے کہ ’پاکستانی فورسز نے سرحدی باڑ لگا کر افغان طالبان سے چھینی گئی زمین پر مستقل قبضہ کر لیا ہے۔‘

افغانستان اور پاکستان کے درمیان سرحد کو ’ڈیورینڈ لائن‘ کہا جاتا ہے جسے افغان حکومتوں نے ماضی میں دونوں ممالک کی سرحد کے طور پر باضابطہ طور پر تسلیم نہیں کیا۔ اگرچہ اقوام متحدہ سمیت بین الاقوامی تنظیمیں اس لائن کو دونوں ممالک کی سرحد تسلیم کرتی ہیں۔

پاکستان نے باڑ لگا کر افغانستان کی سر زمین کا جو علاقہ گھیرا ہے، اسے چوکور نشان میں دکھا گیا ہے ،تصویر کا کیپشنپاکستان نے باڑ لگا کر افغانستان کی سر زمین کا جو علاقہ گھیرا ہے، اسے چوکور نشان میں دکھا گیا ہے
یہ علاقہ کہاں واقع ہے؟
پکتیکا صوبے کے جنوب مغرب میں پاکستانی سرحد کے ساتھ ایک علاقہ ہے۔ یہ ایک ایسے ابھار کی طرح لگتا ہے جو پاکستان کی طرف جا رہا ہے۔

گوگل ارتھ سیٹلائٹ تصاویر سے ظاہر ہوتا ہے کہ گذشتہ چار سال سے اس علاقے پر دونوں ممالک کی سرحد کے درمیان باڑ لگی ہوئی ہے۔ پاکستان طویل عرصے سے افغانستان کے ساتھ اپنی سرحد کے ساتھ باڑ لگا رہا ہے۔