سپریم کورٹ کے دو بنچز 4 سے 6 نومبر تک کوئٹہ میں مقدمات کی سماعت کریں گے

کوئٹہ: سپریم کورٹ آف پاکستان کے دو بنچز 4 نومبر سے 6 نومبر 2026 تک کوئٹہ میں مقدمات کی سماعت کریں گے۔ سماعت کے لیے مقرر مقدمات میں بلوچستان ہائی کورٹ اور بلوچستان سروس ٹریبونل کے فیصلوں اور احکامات کے خلاف دائر درخواستیں شامل ہیں۔

جاری کردہ شیڈول کے مطابق 4 اور 5 نومبر کو جسٹس جمال خان مندوخیل، جسٹس نعیم اختر افغان اور جسٹس محمد ہاشم خان کاکڑ پر مشتمل بنچ مقدمات کی سماعت کرے گا۔

6 نومبر کو دو الگ الگ بنچز سماعت کریں گے۔ پہلے بنچ میں چیف جسٹس آف پاکستان جسٹس یحییٰ آفریدی اور جسٹس جمال خان مندوخیل شامل ہوں گے، جبکہ دوسرے بنچ میں جسٹس نعیم اختر افغان اور جسٹس محمد ہاشم خان کاکڑ مقدمات کی سماعت کریں گے۔

سپریم کورٹ کے جاری کردہ شیڈول کے مطابق مقدمات کی فہرست عدالتِ عظمیٰ کی سرکاری ویب سائٹ پر دستیاب ہے، جہاں متعلقہ فریقین اور وکلا سماعت سے متعلق تفصیلات حاصل کرسکتے ہیں۔