گھر گرانے کے نوٹس کے بعد گارڈ روم مسمار کرنے کی دھمکیاں بھی دی جا رہی ہیں، کامران مرتضیٰ

مولانا فضل الرحمٰن کے مؤقف کے بعد دھمکیوں اور دباؤ کا سلسلہ شروع کر دیا گیا، اب بات گھر گرانے سے آگے گارڈ روم گرانے کی دھمکیوں تک پہنچ گئی ہے، ایسی دھمکیوں سے خوفزدہ نہیں ہوں گے، ڈٹ کر مقابلہ کریں گے۔ سینیٹر کامران مرتضیٰ ایڈووکیٹ

جمعیت وکلاء فورم پاکستان کے مرکزی صدر سینیٹر کامران مرتضیٰ ایڈووکیٹ نے سی ڈی اے کی جانب سے نوٹس جاری کرنے اور گھر گرانے کی دھمکیوں پر سخت ردعمل دیتے ہوئے کہا ہے کہ مولانا فضل الرحمٰن کی تقریر کے بعد نقوی صاحب کے بیان اور پھر خواجہ آصف کے ردعمل کے تناظر میں دھمکیوں اور دباؤ ڈالنے کا سلسلہ شروع کر دیا گیا ہے۔

انہوں نے کہا کہ مولانا فضل الرحمٰن کی تقریر کے بعد پیدا ہونے والی صورتحال میں اب گھروں کو گرانے کی دھمکیاں دی جا رہی ہیں، یہاں تک کہ مولانا صاحب کے گارڈ روم کو بھی گرانے کی باتیں کی جا رہی ہیں۔ یہ اقدامات دباؤ ڈالنے اور خوفزدہ کرنے کی کوششوں کا حصہ ہیں، لیکن ہم ایسی دھمکیوں اور ہتھکنڈوں سے ہرگز مرعوب نہیں ہوں گے۔

سینیٹر کامران مرتضیٰ ایڈووکیٹ نے کہا کہ اختلافِ رائے کا جواب دھمکیوں اور دباؤ کے ذریعے دینا کسی صورت قابلِ قبول نہیں۔ ہم اپنے مؤقف پر قائم ہیں اور کسی بھی غیر قانونی اقدام کا آئین و قانون کے دائرے میں رہتے ہوئے بھرپور مقابلہ کریں گے۔

انہوں نے واضح کیا کہ گھر گرانے کی دھمکیوں سے لے کر گارڈ روم گرانے کی باتوں تک، ایسے تمام ہتھکنڈے ہمیں اپنے اصولی مؤقف سے پیچھے نہیں ہٹا سکتے۔