سربیا، طلبا کی احتجاجی تحریک رنگ لے آئی، انتخابات میں طویل عرصے سے برسر اقتدار رہنما کو شکست

سربیا میں طلبہ کی قیادت میں جاری احتجاجی تحریک نے سیاسی میدان میں اہم کامیابی حاصل کرلی، جہاں طویل عرصے سے بااثر رہنما الیگزینڈر ووچچ نے قبل از وقت پارلیمانی انتخابات میں اپنی جماعت کی شکست تسلیم کرلی۔ انتخابی نتائج سامنے آنے کے بعد دارالحکومت بلغراد سمیت مختلف شہروں میں شہری سڑکوں پر نکل آئے اور جشن منایا۔

ابتدائی انتخابی اعداد و شمار کے مطابق ووٹنگ میں ریکارڈ ٹرن آؤٹ دیکھنے میں آیا۔ یہ انتخابات گزشتہ دو سال سے جاری احتجاجی مظاہروں کے بعد ہوئے، جن کا آغاز نووی ساد شہر میں ریلوے اسٹیشن کی چھت کا سائبان گرنے کے واقعے کے بعد ہوا تھا۔ اس حادثے میں 16 افراد ہلاک ہوئے تھے، جس کے بعد ملک میں بدعنوانی اور انتظامی غفلت کے خلاف احتجاج شروع ہوگیا۔

الیگزینڈر ووچچ دو مرتبہ صدر رہ چکے ہیں، تاہم آئینی پابندی کے باعث تیسری مرتبہ صدارتی انتخاب نہیں لڑ سکتے تھے۔ انہوں نے اپنی سربیئن پروگریسو پارٹی کے ذریعے دوبارہ وزارتِ عظمیٰ حاصل کرنے کی کوشش کی، لیکن انتخابی شکست کا سامنا کرنا پڑا۔

طلبہ تحریک کے امیدوار الیا سردانووچ نے کہا کہ سربیا ایک آزاد ریاست بنے گا۔ تحریک کے رہنماؤں نے بدعنوانی کے خاتمے اور ملک میں سیاسی تبدیلی لانے کے عزم کا اظہار کیا۔

نتائج کے اعلان کے بعد مختلف شہروں میں شہریوں نے رقص، نعرے بازی اور آتش بازی کے ذریعے خوشی منائی۔