ہرنائی: مسلح افراد کا کوئلہ کانوں پر حملہ، 5 کانوں کی مشینری نذر آتش

ہرنائی کے علاقے طالب لیزا میں نامعلوم مسلح افراد نے کارروائی کرتے ہوئے 5 کوئلہ کانوں میں نصب مشینری کو آگ لگا دی، جس کے نتیجے میں قیمتی مشینری جل کر خاکستر ہوگئی۔

پولیس ذرائع کے مطابق مسلح افراد نے کارروائی کے دوران 3 انجن، 2 کمپریسرز اور دیگر قیمتی مشینری کو نذر آتش کیا، جس سے کان مالکان اور ٹھیکیداروں کو لاکھوں روپے کا نقصان پہنچا۔

پولیس کے مطابق حملہ آوروں نے ٹھیکیداروں عبدالخالق، حضرت، محمد نبی، شیخ محمد اور نجیب کی کوئلہ کانوں کو نشانہ بنایا۔

واقعے کی اطلاع ملتے ہی پولیس کی بھاری نفری موقع پر پہنچ گئی اور علاقے کا جائزہ لینے کے بعد واقعے کی تحقیقات شروع کردی گئی ہیں۔