ہرنائی: نامعلوم مسلح افراد کی 5 کوئلہ کانوں میں کارروائی، قیمتی مشینری جلا دی

ہرنائی کے علاقے طالب لیز کوئلہ مائنز میں نامعلوم مسلح افراد نے 5 کوئلہ کانوں میں نصب قیمتی مشینری کو آگ لگا کر نذرِ آتش کردیا۔

پولیس کے مطابق مسلح افراد نے کارروائی کے دوران 3 انجن اور 2 کمپریسر سمیت کانوں میں موجود دیگر مشینری کو جلا دیا۔ واقعے میں ٹھیکیداران عبدالخالق، حضرت، محمد نبی، شیخ محمد اور نجیب کی کوئلہ کانوں کو نشانہ بنایا گیا۔

پولیس ذرائع کے مطابق مسلح افراد کی کارروائی کے نتیجے میں متعلقہ ٹھیکیداروں کو لاکھوں روپے کا نقصان پہنچا ہے۔

واقعے کی اطلاع ملتے ہی پولیس کی بھاری نفری موقع پر پہنچ گئی اور علاقے کا جائزہ لینے کے بعد واقعے کی تحقیقات شروع کردی گئی ہیں۔