سعودی سلامتی پر سمجھوتا ناممکن؛ پاکستان دفاع کیلیے ہرحد پار کرنے کو تیارہے، ڈی جی آئی ایس پی آر

اسلام آباد: ڈی جی آئی ایس پی آر لیفٹیننٹ جنرل احمد شریف چوہدری نے کہا ہے کہ سعودی عرب کی سلامتی اور حرمین شریفین کے تحفظ پر کوئی سمجھوتا نہیں کیا جاسکتا، پاکستان سعودی عرب کے دفاع کے لیے ہر ممکن اقدام کے عزم پر قائم ہے۔

عرب ٹی وی کو انٹرویو دیتے ہوئے لیفٹیننٹ جنرل احمد شریف چوہدری نے کہا کہ سعودی عرب کی سالمیت اور حرمین شریفین کے تحفظ کے لیے پاکستان ہر قسم کی قربانی دینے اور کسی بھی جارحیت کی صورت میں بھرپور دفاع کرنے کے عزم پر کاربند ہے۔

انہوں نے کہا کہ حرمین شریفین کی حفاظت کے حوالے سے پاکستانی عزم غیر متزلزل ہے، سعودی عرب کی سلامتی کے تحفظ کے لیے پاکستان ہر سطح پر تعاون جاری رکھے گا اور کسی بھی جارحانہ اقدام کے خلاف سعودی عرب کے ساتھ کھڑا رہے گا۔

ترجمان پاک فوج نے دونوں ممالک کے تاریخی، سیاسی اور عسکری تعلقات کو مضبوط قرار دیتے ہوئے کہا کہ سعودی سلامتی کے لیے پاکستان کا عزم غیر مشروط ہے۔ ان کے مطابق دونوں ممالک دفاعی تعاون اور معاہدوں کی بنیاد پر باہمی اعتماد کے ساتھ خطے میں امن و استحکام کے لیے کوششیں جاری رکھے ہوئے ہیں۔

ڈی جی آئی ایس پی آر نے کہا کہ دفاعی حکمت عملی اور فوجی کارروائیوں کی تفصیلات عوامی سطح پر ظاہر نہیں کی جاتیں۔ کسی بھی ہنگامی صورتحال میں متعلقہ ممالک باہمی مشاورت سے آئندہ کا لائحہ عمل طے کرتے ہیں۔

انہوں نے مزید کہا کہ مکہ معاہدہ خالصتاً دفاعی نوعیت کا ہے اور پاکستان و سعودی عرب کے درمیان دفاعی تعاون کے متعدد معاہدے پہلے سے موجود ہیں۔ سکیورٹی معاملات پر مشاورت جاری رہتی ہے، تاہم بروقت فیصلوں اور جوابی کارروائی کا اختیار متعلقہ ممالک کے پاس ہوتا ہے۔