ہر مریض کو محفوظ اور بروقت طبی سہولیات دینا حکومت کی ذمہ داری ہے، وزیراعلیٰ بلوچستان

کوئٹہ: وزیراعلیٰ بلوچستان میر سرفراز بگٹی نے ورلڈ پیشنٹ سیفٹی ڈے کے موقع پر ہر مریض کو محفوظ، معیاری اور بروقت طبی سہولیات کی فراہمی کے عزم کا اعادہ کیا ہے۔

اپنے پیغام میں وزیراعلیٰ بلوچستان نے کہا کہ ہر مریض کو محفوظ اور معیاری طبی نگہداشت فراہم کرنا حکومت کی ذمہ داری ہے۔ حکومت بلوچستان صحت کے شعبے میں اصلاحات اور طبی سہولیات کی بہتری کے لیے عملی اقدامات جاری رکھے ہوئے ہے۔

میر سرفراز بگٹی نے کہا کہ ہسپتالوں میں سہولیات کی بہتری، طبی عملے کی استعدادِ کار بڑھانے اور جدید نظام کے فروغ پر خصوصی توجہ دی جا رہی ہے تاکہ مریضوں کو بہتر طبی سہولیات میسر آسکیں۔

انہوں نے کہا کہ دل، ذیابیطس، کینسر اور دیگر غیر متعدی بیماریوں میں مبتلا مریضوں کے لیے محفوظ اور مسلسل طبی نگہداشت نہایت ضروری ہے۔

وزیراعلیٰ بلوچستان کا کہنا تھا کہ مریضوں کا تحفظ صحت کے مؤثر نظام کی بنیادی ترجیحات میں شامل ہے اور حکومت بلوچستان اس حوالے سے اقدامات کو مزید مؤثر بنائے گی۔